هو انا لوحدي ايلي بحب الحاجات البسيطة ايلي من غير أي أضافات؟
أكيد لأ, لكن انا شايف كل ما الحاجه تكون بسيطة بتبقي رائعة.
مثلاً:الشخص ايلي تلاقية برأي هنا و رأي هناك و يروح يطنطط عند ده شوية و يطنطط عن ده شوية .. و متعرفش أصل شخصيتة أيه !! كل ده بيبقي بسبب انه نسي بساطتة و رأيه الشخصي ايلي مبيعجيش ايلي حواليه و اكيد مبيبقاش ذنبه .. و غالباً بيبقي ذنب الناس ايلي نسيو ان لكل انسان رأي و هو حر في رأيه و بالتالي بيطردوه من المجتمع بتاعهم ف بيضطر أنه يطنطط عشان يعجبهم.
و "الوكسه" بقي البنت ايلي بمكياج كتير !! بتبقي حاجه قرف هو مفيهاش حاجة انك تحطي مكياج بس مش لدرجة ان الواحد يحس أنه قدام بلياتشو، الجمال في البساطة.
و البساطه بتبقي في شخصيتك و شخصيتي و ده شئ رائع لما تشوف كل حاجة ببساطة لأنك لما تكون بسيط في تعاملك مع الناس عمرك ما هتقابل المشاكل كبيره،
وبعدين انت هتتعايش مع "الكولكيعه" ايلي انت عملتها لنفسك وعايش جواها و لما تطلع منها هتخسر !! أيوه هتخسر !! هتخسر ناس أصلاً خسارتهم مكسب وأكيد هتلاقي نفسك .. و المكسب هنا هو اكبر مكسب ممكن تقابله في حياتك و هو انك تكسب نفسك،
و خساره بساطك دي بتبقي بسبب شخص بيوهمك بحاجات جديده عليك بتخليك عايز تعملها ده بس عشان ترضي فضولك ايلي بيغلبك
صح بقي او غلط حسب الشخص ايلي بتقابله و بيخليك عريان عشان تبتدي من جديد تتغير كتير و تنسي نفسك .. قصدي تنسي بساطتك!! ايلي هي كانت بتتمثل في
مثلاً انا كانت بتتمثل في مجلات ميكي و كام شخصيه أثرت فيا جداً و انا صغير و للأسف كل ما بكبر كل ما بقول انا كبرت و مينفعش أقراءها "خيبه" بعيد عنك .. المهم
غيري: الاغاني الشعبي و المهرجانات و الهلس ده ... مهرجانات !! أيوه مهرجانات !! في ناس بساطتها في كده .. طبيعتها كده منقدرش نقول عليهم حاجه ده رأيهم و هما عندهم "عقل" و بيفكرو و هكذا و هكذا........
كل واحد كان ليه حاجات بالنسبه له حياه و دي البساطه بعد ما كبر طنش و نسي و مبقاش بيسيط
بس بعد كل ده هرجع و أقول يا ريتني فضلت "أنا" !!
يا ريتني فضلت انا
انا البسيط ايلي من غير أي أضافات..
انا البسيط ايلي مبيعملش قرد عشان يعجب ايلي يسوي و ايلي ميسواش..
انا البسيط ايلي البساطة في جمالي ايلي مش مصطنع..
انا البسيط ايلي البساطة عنوان شخصيتي..
أنا البسيط ايلي بساطتي في أي حاجه "تعجبني"
و عشان كده هقول أن:
"البساطة أهم ما في شخصيتك فقدتها فقدت نفسك"
